Dr. Arben A.Camin, Drejtor I Departamentit të Shërbimeve Shëndetësore në Ministrinë e Shëndetësisë.

M.F:  Dr. Cami, si e shihni vitin që po lëmë pas, dhe si do ta karakterizonit atë nga këndvështrimi juaj?

Dr.A.Cami: Duke qenë se IPVQ e Kosovës, gjatë vitit 2003 kanë filluar të ushtrojnë në një masë më të madhe kompetencat e transferuara, janë evidente edhe përparimet e bëra në lëmi të ndryshme brenda Ministrisë së Shëndetësisë.

Kjo mund të vërehet edhe në punën e Ministrive të tjera, gjë që është reflektuar me një punë më të suksesshme të tërë Qeverisë së Kosovës.

Sa i përket Ministrisë së Shëndetësisë në tërësi dhe Departamentit të Shërbimeve Shëndetësore, mendoj se gjatë kësaj periudhe janë marrë hapa konkrete rreth implementimit të Qëllimeve të cilat parashihen në  Politikën Shëndetësore të Kosovës (Librin e Verdhë).

Edhe pse në fillim të funksionimit të tij, Sistemi Informativ Shëndetësor na ka mundësuar gjenerimin e të dhënave ndonëse jo edhe aq ekzakte, për statusin shëndetësor të popullatës, por këto të dhëna të mbështetura me të dhënat nga organizmat ndërkombëtar që ushtrojnë veprimtarinë e tyre në fushën e shëndetësisë,  tregojnë se disa nga indikatorët kryesor shënojnë një përmirësim sado të vogël krahasuar me vitin e kaluar, edhe pse ende jo të kënaqshme.

Në drejtim të arritjes së qëllimeve të Politikës Shëndetësore hap i rëndësishëm është  inicimi i dizajnimit të Strategjive për arritjen e qëllimeve të Politikës Shëndetësore.

Një dimension tjetër është lidhja e këtyre qëllimeve me Qëllimet Zhvillimore të Mileniumit, dizajnuar nga Organizata e Kombeve të Bashkuara, si dhe bashkërenditja e veprimeve në mes Ministrisë së Shëndetësisë dhe Organizatave të KB që veprojnë në fushën e shëndetësisë.

MF: Zoti Cami, Sipas mendimit tuaj në cilat fusha janë bërë progrese të dukshme gjatë këtij viti?

Dr. A. Cami:  Unë mendoj se edhe përkundër vështirësive të shfaqura gjatë këtij viti, sikurse kanë qenë, ndërrimi i Ministrit, riorganizimi i Ministrisë, stafi jo komplet si dhe probleme të tjera, viti që po lamë pas mund të konsiderohet se ka shënuar progrese të dukshme në fusha të caktuara si psh:

Në plotësimin e legjislacionit përmes finalizimit të Draft Ligjit dhe pruarjes së disa akteve nën ligjore;

Inicimin e përpilimit të strategjive për arritjen e Qëllimeve të Politikës Shëndetësore;

Kanë filluar të aplikohen praktika të standardizuara, si psh. në Hartimin dhe Shpenzimin e Buxhetit; Ju e dini se ky ishte viti i parë që IPVQ-se të Kosovës përpiluan për herë të parë në mënyrë të pavarur Buxhetin e Konsoliduar të Kosovës;

Në masë të madhe janë aplikuar Rregulloret mbi shërbimin Civil;

Është bërë një Monitorim i vazhdueshëm i Institucioneve Shëndetësore, që ka rezultuar me një ngritje të kualitetit të shërbimeve shëndetësore në Institucionet tona, si dhe me përmirësimin e disa praktikave të papëlqyeshme;

Ka filluar të bëhet një planifikim më i mirë i burimeve njerëzore, përfshirë këtu Edukimin e Vazhdueshëm Profesional, sigurimin e procedurave të nevojshme dhe materialeve për trajnime të stafit;

MF: Zoti Cami, cilat do të ishin fushat ku ju mendoni se nuk është bërë aq sa duhet dhe në  të cilat Ministria e Shëndetësisë do të duhej të përqëndrohej  në vitin që vjen?

Dr. A.Cami: Në përgjithësi mendoj se ende ka për tu bërë mjaft në të gjitha sferat e Sistemit Shëndetësor. Ne jemi në fillim të një procesi ku krahas themelimit të një administrate, pra themelimit të Ministrisë, ne njëherit është dashur të ushtrojmë edhe funksionet e kordinimit, mbikqyrjes dhe në disa aspekte edhe menaxhimit të një sistemi i cili vite me rradhë ka qenë i lënë pas dore.

Ndër sfidat për të cilat nuk ka mundur të gjenden zgjidhje të kënaqshme, dhe me të cilat Ministria do të duhet ballafaquar edhe në periudhën që vjen do të përmendja:

Formulimi i një politike gjithëpërfshirëse dhe të qëndrueshme për Sektorin    Farmaceutik;

Formulimi i një politike gjithëpërfshirëse dhe të qëndrueshme për Sektorin privat;

Sigurimi i kuadrave në KPSH dhe atyre të profileve deficitare;

Përmirësimi i raporteve të përgjithshme dhe të monitorimit ndaj KPSH, dhe marrja e masave adekuate në Institucionet Shëndetësore të KPSH për zbatimin dhe përmirësimin e vazhdueshëm të shërbimeve shëndetësore; 

Vazhdimi i përpjekjeve për kthimin e punëtorëve shëndetësor në spitalin e Mitrovicës në veri të qytetit; dhe

Inkorporimi i minoriteteve në Sistemin Shëndetësor të Kosovës dhe eliminimi i strukturave paralele;

MF: Zoti Cami, Kujt do ti ja dedikonit të arriturat e deritanishme, dhe cila do të ishte porosia e juaj lexuesve të Revistës tonë?

Dr. A.Cami: Këto të arritura u dedikohen pikë së pari vetë punëtorëve shëndetësor, menaxherëve të institucioneve shëndetësore, bashkëpunimit më të mirë brenda IPVQ-së, ndihmës së vazhduar të organizmave ndërkombëtare, si dhe gjithë stafit të MESH, i cili edhe për kah vështirësitë e theksuara në organizimin dhe kompletimin e MESH, ka dhënë kontributin e vetë të çmuar. Me këtë rast unë do të doja të falemnderoj posaçërisht  stafin e Departamentit tim për punën e tyre gjatë kësaj periudhe të vështirë.

Për lexuesit tuaj të nderuar, dhe këtu së pari kam parasysh, popullatën, Mjekët dhe Infermierët Familjar, porosia ime do të ishte që ata të krijojnë një besim të ndërsjellë, që të bashkëpunojnë më shumë mes veti me qëllim të ruajtjes dhe përparimit të shëndetit të mbarë popullatës së Kosovës. Dhe gjithnjë duke mos haruar thënjen e vjetër, kuptimin e të cilës ne e kemi inkorporuar edhe në Politikën Shëndetësore, ”Më mirë është të ndalosh sëmundjen se sa të shërosh atë; A nuk është kjo edhe roli i i Mjekësisë Familjare.

MF: Zoti Cami, Ju falemnderit për intervistën dhe duke ju uruar suksese të reja në punën tuaj, njëherit ju urojmë edhe Vitin e Rri 2004.

Dr. A.Cami: Ju falemnderit.

Copyright © 2002-2007, CDFMK. All rights reserved. www.cdfmk.org. Powered by dr.vali